Հայաստանի Հանրապետության մարդու իրավունքների պաշտպանի աշխատակազմի Խոշտանգումների եւ վատ վերաբերմունքի կանխարգելման վարչությունը՝
- ապահովում է Մարդու իրավունքների պաշտպանի՝ որպես «Խոշտանգումների եւ այլ դաժան, անմարդկային կամ արժանապատվությունը նվաստացնող վերաբերմունքի կամ պատժի դեմ կոնվենցիայի» կամընտիր արձանագրությամբ սահմանված կանխարգելման անկախ ազգային մեխանիզմի գործառույթների պատշաճ եւ արդյունավետ իրականացումը,
- քաղաքացիներին տրամադրում է իրավաբանական խորհրդատվություն` իրենց իրավունքների ու ազատությունների, ինչպես նաեւ դրանց արդյունավետ պաշտպանության իրավական միջոցների եւ ընթացակարգերի վերաբերյալ,
- իր իրավասության սահմաններում կատարում է քաղաքացիների ընդունելություն,
- ապահովում է ազատությունից զրկված անձանց (ազատությունից զրկված անձանց ընտանիքի անդամների, նախկինում ազատությունից զրկված անձանց) իրավունքների խախտումների վերաբերյալ դիմում-բողոքների ուսումնասիրության եւ քննարկման ընթացակարգը,
- դիմում-բողոքների քննարկման ընթացակարգն ապահովելու նպատակով իրավասու պետական եւ տեղական ինքնակառավարման մարմիններից ու դրանց պաշտոնատար անձանցից պահանջում է տեղեկատվություն, պարզաբանումներ եւ դրանք հիմնավորող համապատասխան փաստաթղթեր,
- իրականացնում է ազատությունից զրկված անձանց իրավունքների պաշտպանության ոլորտի ներպետական իրավական ակտերում օրենսդրական խնդիրների ու բացերի վերհանում եւ վերլուծություն‚ անհրաժեշտության դեպքում նախապատրաստում է համապատասխան պետական մարմիններին ուղղված գրություններ եւ առաջարկներ,
- իրականացնում է ազատությունից զրկված անձանց իրավունքների, պահման վայրերի, պայմանների ուսումնասիրություններ (մոնիթորինգ),
- կատարում է այցելություններ այն վայրեր, որտեղ կան ազատությունից զրկված անձանց իրավունքների եւ ազատությունների խախտումներ կամ դրանց առկայության մասին ենթադրելու հիմքեր,
- մասնակցում է հրապարակային զեկույցների մշակման աշխատանքներին՝ ազատությունից զրկման վայրեր իրականացվող այցելությունների արդյունքների վերլուծության եւ համակարգային խնդիրների վերհանման միջոցով,
- մասնակցում է հասարակական եւ միջազգային կազմակերպությունների, պետական մարմինների ներկայացուցիչների‚ միջազգային փորձագետների եւ այլ անձանց հետ հանդիպումներին եւ քննարկումներին,
- իր իրավասության շրջանակներում համագործակցում է պետական եւ տեղական ինքնակառավարման մարմինների եւ միջազգային կազմակերպությունների հետ: