ՀՀ Մարդու իրավունքների պաշտպան Արման Թաթոյանն ապրիլի 10 ին աշխատանքային այց է կատարել Սյունիքի մարզ: Այցի ընթացքում կազմակերպվել է քաղաքացիների Քարաշեն, Կոռնիձոր և Տեղ համայնքների բնակիչների ընդունելություն: Պաշտպանի կողմից ուսումնասիվել են բնակիչների կողմից բարձրացված խնդիրները, որոշ բողոքների հիմքով Պաշտպանի լիազորությունների շրջանակներում սկսվելու է քննության ընթացակարգ:
Այցի ընթացքում Արման Թաթոյանը հանդիպում է ունեցել նաև Գորիս քաղաքում գործող հասարակական կազմակերպությունների ներկայացուցիչների հետ: Ձեռք են բերվել ՀԿ-ների հետ համագործակցության պայմանավորվածություններ ու համատեղ աշխատանքի ուղղություններ: Տեղի է ունեցել նաև հանդիպում Գորիսի քաղաքապետ Վաչագան Ադունցի հետ:
Մարդու իրավունքների պաշտպանը Տեղ համայնքում մասնակցել է Հայաստանում Լեհասանի Հանրապետության արտակարգ և լիազոր դեսպան Եժի Մարեկ Նովակովսկիի նախաձեռնությամբ տեղի միջնակարգ դպրոցում աշակերտների կազմակերպված միջոցառմանը: Միջոցառմանը ներկա է եղել նաև Լեհաստանի Երեխաների իրավունքների պաշտպան Մարեկ Միխալակը, ով Հայաստանում է գտնվում Արման Թաթոյանի հրավերով: Միջոցառման ավարտին Լեհաստանի պատվիրակության և Պաշտպանի ներկայացուցիչները երեխաներին հանձնել են նվերներ:
